Milani vijon kërkimin për një sulmues që të shoqërojë Santi Gimenezin në repartin ofensiv, ndërsa në pritje të Vlahoviçit dhe duke sondazhuar edhe Gonçalo Ramosin, nga Gjermania vijnë deklarata intriguese nga Pavel Kuka, agjenti i Patrik Shikut.
Në një intervistë për “Milannews”, Kuka nuk përjashton një transferim të sulmuesit çek në Milano, megjithëse e sheh të vështirë largimin e tij këtë verë nga Bajer Leverkusen. “Futbolli është i paparashikueshëm, por Shik ka edhe dy vite kontratë me Leverkusenin”, tha Kuka, duke theksuar se klubi gjerman ka humbur shumë lojtarë kyç dhe do të ishte goditje e rëndë të humbiste edhe Shikun. Megjithatë, agjenti thekson se një rikthim në Itali dhe sidomos te Milani do t’i pëlqente shumë sulmuesit.
“Për Milanin, blerja e Shikut do të ishte një fitore e madhe. Ai është një lojtar me cilësi të jashtëzakonshme dhe çmimi i tij nuk është i lartë për nivelin që ka”, shtoi Kuka. Ai gjithashtu zbuloi se interesimi për Shikun nuk vjen vetëm nga Milani, por nga disa klube të tjera të mëdha në Europë. Në lidhje me të ardhmen e sulmuesit, agjenti u shpreh me rezervë.
“Shumë gjëra mund të ndodhin. Më parë ai ka qenë në bisedime me Mançester Junajtidin, por faktori sportiv është vendimtar. Te Leverkuseni ai ka fituar Bundesligën dhe Kupën e Gjermanisë, duke arritur edhe në prag të tripletës. Pjesëmarrja në Champions gjithashtu është një motiv i rëndësishëm për të qëndruar”. Megjithatë, Pavel Kuka nuk përjashton mundësinë e një transferimi në Milano këtë verë, duke lënë të hapura dyert e merkatos për një nga sulmuesit më të fortë aktualë në Europë.
