Policia e Shtetit ka marrë pjesë në operacionin ndërkombëtar “Stream”, i cili synon goditjen e rasteve të shfrytëzimit seksual të të miturve në internet. Ky operacion është zhvilluar në bashkëpunim me agjencitë ligjzbatuese të 35 shteteve dhe është drejtuar nga Policia Kriminale Shtetërore e Bavarisë dhe Zyra Qendrore Bavareze për Ndjekjen e Krimit Kibernetik, me mbështetjen e EUROPOL-it.
Në kuadër të këtij operacioni, autoritetet gjermane dhe EUROPOL kanë sinjalizuar Policinë Shqiptare për përfshirjen e një shtetasi shqiptar në këtë veprimtari kriminale. Si rezultat, Drejtoria për Hetimin e Krimeve Kibernetike ka nisur procedurat për veprën penale të “Pornografisë” me të mitur.
Pas hetimeve, është identifikuar i dyshuari, shtetasi M.Z., 29 vjeç, banues në Tiranë. Me vendim të Gjykatës së Tiranës, është kryer kontroll në banesën e tij, ku janë sekuestruar tre celularë dhe një laptop, të cilët po i nënshtrohen ekzaminimeve kompjuterike për prova të mëtejshme.
Hetimet vazhdojnë për të dokumentuar plotësisht këtë rast dhe për të zbuluar ndërlidhje të mundshme me rrjete të tjera kriminale që veprojnë në fushën e abuzimit online të të miturve.
