Pas ngjarjes makabre që ndodhi mëngjesin e djeshëm në Milot, paraprakisht u tha se autorja 35-vjeçare e kishte vrarë bashkëshortin për shkak të dhunës sistematike, e cila vinte si pasojë e xhelozisë që kishte ndaj saj.
Vrasja
Krimi ndodhi në mes të tregut të Milotit, rreth orës 07:10. Violeta Donaj, 35-vjeçe, banuese në Rrëshen, ka vrarë me pistoletë shtetasin Kujtim Donaj, 42-vjeç. Menjëherë pas vrasjes, 35- vjeçarja e tronditur ka tentuar te largohet, por është vënë në prangat e policisë, teksa kishte dalë në autostradë dhe mbante duart lart.
Shkaqet e krimit makabër
Pretendohet se xhelozia, dhuna sistematike nga i shoqi, debatet për shkak të bixhozit, janë bërë shkak të ngjarjes tragjike, ku Violeta Donaj, nënë e dy fëmijëve të mitur qëlloi katër herë me pistoletë ndaj bashkëshortit të saj, Kujtim Donaj.
Dëshmitarët
Sipas dëshmitarëve, çifti banonte në Rrëshen dhe çdo të diel shkonin në treg. Mësohet se Kujtim Donaj ka qenë duke hapur mallin në tezgën që kishte në treg, kur ka ardhur gruaja e tij dhe e ka qëlluar, duke i shkaktuar vdekjen e menjëhershme. Tregtarë në tregun e Milotit, të frikësuar nga ngjarja thonë se nuk dinë asgjë rreth shkaqeve që çuan gruan 35-vjeçare në kryerjen e këtij akti ekstrem.
Ata e njihnin çiftin Donaj si shitës së rrobave të fëmijëve në treg. Një nga tregtarët i tha policisë se viktima i kishte kërkuar gruas të bënte sa me shpejt 10 mijë lekë të vjetra xhiro dhe t’ia jepte atij. Gjithashtu, sipas dëshmitarëve, mëngjesin kur ndodhi krimi, Kujtim Donaj kishte shkuar i pari në treg me një fugon mallrash. Pak minuta më vonë mbërriti Violeta Donaj, së bashku me kunatën. Sapo ka zbritur nga makina, 35-vjeçarja ka qëlluar ndaj bashkëshortit.
Autorja e penduar pas krimit
Pas vrasjes, 35-vjeçarja mes lotësh është dëgjuar të thotë: “Oj nanë, ç‘bëra unë”. Në gjendje të rëndë psikologjike, Violeta Donaj mësohet të këtë deklaruar gjatë shoqërimit në polici, se shkak për aktin ekstrem ishte bërë dhuna sistematike nga i shoqi, e cila vinte si pasojë e xhelozisë që kishte ndaj saj. Po ashtu bazuar në deklaratat e gruas, bashkëshorti luante në lojëra fati, gjë që kishte ndikuar në krijimin e vështirësive financiare. Ndërkohë, grupi hetimor në bashkëpunim me Prokurorinë e Rrethit Gjyqësor Kurbin, po vazhdojnë hetimet për zbardhjen e plotë të rrethanave të ngjarjes.
