Deputeti demokrat Asllan Dogjani ka komentuar përplasjen e djeshme në Parlament mes Flamur Nokës dhe Taulant Ballës, e cila kulmoi me hedhjen e një bidoni uji. Në një intervistë televizive, ai tha se ky incident ishte rezultat i ndërprerjes së vazhdueshme të fjalës për deputetët e opozitës.
Dogjani akuzoi maxhorancën se nuk i lejon deputetët demokratë të shprehen lirshëm në Parlament dhe se vetë kryeministri Rama vjen aty vetëm një herë në gjashtë muaj për të mos humbur mandatin. Ai e quajti Parlamentin një institucion të kontrolluar nga mafia politike, duke theksuar se opozita përballet me censurë të vazhdueshme.
Megjithatë, ai konfirmoi se Partia Demokratike do të votojë ndryshimet në Kodin Zgjedhor, kryesisht për të garantuar të drejtën e votës për diasporën. Sipas tij, PD-ja kërkon që qytetarët jashtë vendit të mund të votojnë edhe me pasaportën e shtetit ku ndodhen, pasi shumë emigrantë nuk e kanë më pasaportën apo kartën e identitetit shqiptare.
