Kryetari i Lëvizjes Socialiste për Integrim, Ilir Meta, i njohur në opinionin publik për aftësinë e tij të lartë në politikëbërje, dhe shpesh është etiketuar si njeriu i “veshur” me shumë pushtet, edhe kësaj here nuk ka hezituar të “manipulojë” dëshirën e shqiptarëve.
Siç e dimë, vendi ynë ligjërisht ka hyrë në përgatitjet për fushatën elektorale, qysh prej dy muajsh.
Mirëpo, duke qenë se opozita prej 50 ditësh ka “pushtuar” hapësirën para Kryeministrisë, dhe nuk pranon të hyjë në zgjedhje pa garancinë e qeverisë teknike, LSI-ja, e cila kërkon të fuqizojë pozitat e saj në qeverinë Rama, e ka shfrytëzuar me shumë diplomaci këtë situatë.
Në artikulimin publik të përditshëm, Meta është treguar mjaft parimor lidhur me kërkesën e PD-së, duke gjetur hapësirë të flirtojë me të dhe, nga ana tjetër, t’i bëjë presion kryeministrit Rama.
Kjo lëvizje e LSI-së, për hir të së vërtetës, e humbet moralin “politikëbërës” ndaj votuesve shqiptarë.
Shumë nga lexuesit e politikës në vend kanë vërejtur të njëjtën sindromë politike, e cila sa vjen e vjetrohet dhe bëhet më e lehtë për t’u deshifruar.
Meta mbështet kuazën e opozitës për qeveri teknike. Ndërsa, nga ana tjetër, ka 1 muaj që përuron vepra e kërkon vota me sloganin: “Një mundësi për të gjithë”.
Sot, duke parë kokëfortësinë e dy partive të mëdha, lidhur me qëndrimet e tyre dhe “vogëlsinë” që LSI-ja ka për nga numri, Meta është treguar sërish parimor, pasi kësaj here ka dalë huq dhe pa asgjë.
