Autoriteti Italian i Konkurrencës (AGCM) ka gjobitur gjigantin e modës “fast fashion” Shein me 1 milion euro për përdorimin e “mesazheve dhe pretendimeve mjedisore mashtruese dhe/ose të rreme”.
Vendimi u bë publik të hënën dhe vjen vetëm një muaj pas gjobës së rëndë prej 40 milionë eurosh që Franca i vendosi kompanisë për ulje të rreme çmimesh dhe deklarata mashtruese për qëndrueshmërinë.
Gjobën e fundit e mori kompania Infinite Styles Services Co. Limited, e bazuar në Dublin, e cila menaxhon faqen europiane të Shein.
Sipas AGCM, përmes faqeve të saj online si https://it.shein.com dhe rubrikave promovuese si #SHEINTHEKNOW, evoluSHEIN dhe Social Responsibility, Shein ka shpërndarë deklarata që ishin “të vagullta, të përgjithshme dhe/ose tejet entuziaste”, ndërsa disa prej tyre ishin “mashtruese ose përjashtuese”.
Autoritetet italiane vërejtën veçanërisht pretendimet e Shein për riciklueshmërinë e produkteve dhe për një “sistem qarkullues” për reduktimin e mbetjeve, të cilat rezultuan “ose të pavërteta ose së paku konfuze”.
AGCM gjithashtu hodhi poshtë deklaratat e kompanisë për reduktimin e emetimeve të gazeve serrë.
Shein pretendon se do të ulë emetimet me 25% deri në vitin 2030 dhe të arrijë neutralitetin klimatik në 2050, por sipas autoriteteve, këto synime janë “të paqarta dhe të përgjithshme”, madje “bien ndesh me rritjen reale të emetimeve gjatë viteve 2023 dhe 2024”.
Kjo është hera e dytë brenda pak më shumë se një muaji që një autoritet europian gjobit Shein.
Më herët, një hetim 11-mujor nga autoriteti francez DGCCRF zbuloi praktika tregtare mashtruese, sidomos mbi uljet e çmimeve dhe pretendimet mjedisore. Shein pranoi gjobën dhe deklaroi se kishte ndërmarrë masa për përmirësim që nga njoftimi i shkeljeve.
Përveç çështjeve mjedisore, Shein përballet edhe me hetime të tjera në nivel europian. Komisioni Europian ka hapur hetime mbi shkelje të mundshme të rregullave të mbrojtjes së konsumatorit dhe Aktit për Shërbimet Dixhitale.
Ndërkohë, përpjekjet e Shein për të hyrë në bursë kanë hasur pengesa. IPO-ja e planifikuar në Londër është bllokuar për shkak të mospajtimeve rreth përfshirjes së abuzimeve të të drejtave të njeriut në prospektin e rrezikut, ndërsa tashmë kompania thuhet se ka dorëzuar fshehtas aplikimin për një IPO në Hong Kong.
Kompania kineze është gjithashtu nën akuzë për përdorimin e pambukut nga rajoni i Xinjiang-ut, ku SHBA dhe organizatat joqeveritare kanë akuzuar qeverinë kineze për punë të detyruar dhe abuzime ndaj minoritetit ujgur.
