Drejtuesi i koalicionit “Djathtas për Zhvillim”, Dashamir Shehi, ka komentuar ecurinë e fushatës për zgjedhjet e 11 majit gjatë një intervistë televizive. Shehi shprehu bindjen se ka bërë luftë të madhe për listën e hapur, duke theksuar se nëse do të ishte zbatuar kjo ide, Shqipëria do të kishte një përbërje të re politike, pa pasur më mundësinë që Edi Rama të mbante pushtetin.
Ai shtoi se, pas kaq shumë viteve si deputet, tashmë e konsideron si nder dhe lavdi angazhimin e tij për këtë koalicion dhe për fushatën aktuale. “E vetmja shpresë për opozitën është që grupet e reja të thithin elektoratin që nuk është përfaqësuar nga partitë ekzistuese,” tha Shehi.
Pavarësisht sfidave, Shehi theksoi se nuk është dekurajuar dhe se fushata e tij është sfiduese, por e mbështetur në një program të fortë dhe një skuadër të rinjsh, duke përmendur se ai nuk është një politikan që shkon derë më derë, por që bën politikë me qëndrime të qarta dhe një ekip të angazhuar për të ndryshuar situatën në vend.
Shehi: Kam qenë kaq shumë deputet. Kam 4 vjet që e them që Shqipëria, opozita ka nevojë për rrugëtimin të ri. Nuk mund të vazhdojë kështu. E vetmja shpresë për opozitën, që grupet e reja të thithin elektorat që nuk e marrin këto. Kam bërë luftë për listën e hapur. Po të ishte sot lista e hapur do ishin 140 burra dhe gra dhe do ishte e mbaruar historia me Ramën.
Nuk më dekurajon fare. Koalicionin e drejtoj unë. Nderi, lavdia, turpi janë të mia. Kemi hyrë veç e veç. Kjo nuk e pengon elektoratin të gjej veten. Gjithsekush sipas mundësive, jemi duke bërë një fushatë sfiduese. Këtë do bëj. Unë nuk jam nga ato që shkojnë derë më derë. Hiç me ato që njoh. Ti bie derës së doktorit, apo inxhinierit. Nuk shkon. Nuk bindet njeri te dera. Nëse nuk e kam bindur si qëndrim politik kaq, është e kotë. Kemi program të mirë, skuadër të mirë. Ka njerëz të rinj.
