Skënderbeu tregoi që në ndeshjen e parë të kampionatit se pavarësisht dënimit nga UEFA dhe largimeve të shumta nga skuadra vazhdon të jetë favoriti. Të besuarit e Orges Shehit kanë mposhtur rivalin direkt, Partizanin me rezultatin e ngushtë 1-0 në Korçë. Një nisje mjaft e mirë e kampionatit për “Ujqërit e Dëborës”, por edhe aventura e Orges Shehit si trajner ishte mjaft e mirë. Pas ndeshjes Shehi u shpreh i kënaqur me atë që futbollistët dhanë në fushë dhe dëshirën e tyre për të fituar sërish.
“Është një fitore me vlera, pasi luanim me një rival direkt. Fitorja merr vlera të dyfishta. Më vjen mirë që skuadra ruan ritmin e një jave më parë. Është kënaqësi të shoh djemtë kaq të karikuar dhe të uritur për fitore. Kemi punuar fort mbi kundërshtarin, madje edhe për ndryshimet që do të bënte. Pas ndryshimeve të bëra nga kundërshtari, bëmë edhe ne tonat. Deri para incidentit kemi patur një ritëm të lartë dominant ndaj kundërshtarit. Kam marrë masat që edhe më pas të vijonte në të njëjtin nivel, duke ia dalë pjesërisht”, u shpreh ndër të tjera tekniku Orges Shehi.
Nga ana tjetër Skënder Gega, trajneri i Partizanit është shprehur i pakënaqur me rezultatin dhe se ndeshja u vendos nga një gabim që mund të evitohej. Ai po ashtu ka kërkuar që të bëhen edhe disa përforcime në skuadër. Po ashtu ka folur edhe për situatën e Edgar Çanit.
“Është për të ardhur keq. Erdhëm me pretendimet tona. Në pjesën e parë çaluam në mesfushë, që e mendoja më të fortën. U munduam ta korrigjonim. Pjesën e dytë besoj u kthyem në 4-2-3-1, Hebaj kishte mbështetje të madhe. Nuk jam i kënaqur edhe po të dilja barazim. Gabuam në një moment. Po gjithsesi është ndeshja e parë. Është rrugë e gjatë. Ishim përgatitur për të marrë maksimumin, por futbolli kështu e ka.
Unë kam deklaruar para ndeshjes që kemi nevojë të korrigjohemi në merkato. Kam dhënë mendime që në çfarë repartesh do korrigjohemi. Grupi kryesor është. Jemi stërvitur mirë, kemi bërë më të mirën. U ndëshkuam me një penallti që duhet të evitohej. Futbolli është i tillë. Unë që ditën e parë që kam ardhur nuk e kam deklaruar që e ka stofin e kampionit. Njerëzit kanë dëshirë të madhe, edhe unë gjithashtu. Është fillimi, do ishte mirë të dilnim me sukses sot, çdo gjë do të qartësohet në vazhdim. Rruga është e gjatë.
Edgar Çani? Me Çanin nuk kam një kontratë. Në qoftë se do ta shikosh Çanin, shko tek ekipi i dytë. Në qoftë se ai vjen fizikisht mirë, ai e ka derën e hapur. Unë do marr atë që është në maksimum, dhe atë që do japë maksimumin. Çanin e pamë një vit dhe e dimë çfarë ka bërë.”
