Agron Shehaj solli në Kuvend historinë e Klea Ramës, mbesës fiktive të kryeministrit, e cila mobilizoi në favor të saj ministrinë e Arsimit me një mashtrim të thjeshtë me Whatsapp.
Nëpërmjet një videoje nga Kuvendi në rrjetet sociale, kryetari i Partisë Mundësia tregoi se si 20-vjeçari nga Devolli Ermes Hoxhalli, shpiku një njeri që nuk ekziston, Klea Ramën, dhe atë e përdori për të vënë në lëvizje të gjithë Ministrinë e Arsiimit dhe gjimnazet në vend për të shitur një program të sajuar që premtonte bursa studimi për në SHBA. Ai tha se Çelësi i suksesit ishte prezantimi i tij si Klea Rama, mbesa e Edi Ramës.
“Klea Rama ishte një shpikje e 20-vjeçarit. Mesazhin e saj e lexoi një drejtoreshë gjimnazi para nxënësve. Zv.ministrja e Arsimit i dedikoi një urim në rrjetet sociale.”, tha Shehaj.
Sipas Agron Shehajt, ky është shembulli tipik se kush ka lidhje me pushtetin ka çdo derë të hapur. Se ligjet për njerëzit pranë pushtetit nuk ekzistojnë.
“Kjo tregon që ju keni kapur shtetin. Që kush nuk ka lidhje me pushtetin nuk ka asnjë mundësi, kush ka lidhje me pushtetin i ka dyert e hapura dhe nuk ka nevojë të vërtetoj asnjë gjë. Ligjet për atë nuk ekzistojnë.
Ky është realiteti, nuk janë broçkullat që tregoni ju këtu brenda.
Ky është realiteti shqiptar, kjo është ajo që po ndodh në Shqipëri. E keni kapur shtetin dhe po e përdorni për veten tuaj, i keni vënë poshtë shqiptarët dhe po ju merrni shpirtin. Po pasuroheni dhe po vidhni popullin më të varfër në Europë. Kjo është e vërteta.” – përmbylli Shehaj denoncimin e tij në Kuvend.
