Vëmendja botërore tashmë është e përqendruar tek Koreja e Veriut, por Amerika nuk e largon interesin për të pezulluar programin bërthamor të Teheranit.
Presidenti Donald Trump ka udhëzuar Këshillin e Sigurimit Kombëtar për të shqyrtuar marrëveshjen ndërkombëtare të programit bërthamor të Iranit dhe të vlerësojë, nëse pezullimi i sanksioneve është jetik për interesat e sigurisë kombëtare të Shteteve të Bashkuara.
Sekretari i Shtetit, Rex Tillerson, komentoi mbi këtë shqyrtim, të martën, në një letër për kryetarin e Dhomës së Përfaqësuesve, Paul Ryan.
Zoti Tillerson shkruan se Irani ka vepruar në përputhje me përgjegjësitë, sipas ‘Planit të Përbashkët Gjithëpërfshirës të Veprimit’, që është pranuar në vitin 2015, pas negociatave me SHBA-në, Britaninë, Francën, Kinën, Rusinë dhe Gjermaninë.
“Megjithatë, Irani mbetet një shtet kryesor sponsorizues i terrorit, nëpërmjet shumë platformave dhe metodave”, shkruan Tillerson.
Plani i Përbashkët përqëndrohet në programin bërthamor të Iranit dhe në akuzat se Teherani ishte duke punuar për të zhvilluar armë bërthamore. Qeveria iraniane, në mënyrë të përsëritur, i ka mohuar këto akuza, raporton VOA.
