Avokati Spartak Ngjela deklaratën e ambasadës amerikane se nuk angazhohet me individë të përfshirë në korrupsion, e sheh si vendosmëri për të mos u tërhequr nga shpallja “non grata” e Sali Berishës.
I ftuar në një intervistë televizive, ai tha se kryedemokrati Berisha betejën nuk e ka te pushteti, por e ka që të ruajë paranë që ka fituar kur ka qenë kryeministër.
“Ata nuk tërhiqen nga non grata e Saliut se kanë prova të padiskutueshme. Ata nuk mund të japin “non grata” pa provë.
Si SHBA dhe Anglia në funksion të drejtësisë e kanë të shenjtë. Saliu e di që janë provat, e di që ka qenë që në fillim të viteve 1990 antiamerikan. E di por bën sikur nuk kupton.
Politika e ka në doktrinë të politikës së saj që një “non grata” nuk e takon se e ka proces të vetë juridik, ligjor. Nuk mund ta presë njeri dhe nuk e takon njeri.
Këtë dhe Saliu e ka të qartë. Saliu reziston se nuk ka shpresë se do rikthehet personaliteti i tij në Amerikë. Mashtron radhët e tij, por dhe ata tani po largohen.
Shenjat janë që ka një antiamerikanizëm në radhët e PD. Sondazhet dalin mjaft keq nuk mund të fitojnë këta.
Edhe kur humbet zgjedhjet ai thotë mi vodhe. Po tha X më vodhe shtëpinë, duhet të japë fakte gjurmësh dhe humbjesh që të tregojë që e kanë vjedhur.
Të thuash më vodhën zgjedhjet dhe nuk ke asnjë provë dhe fakt gënjen fansat e tij, fanatikët e tij.
Saliu nuk e ka te pushteti, e ka të ruajë paranë që ka fituar kur ka qenë kryeministër, ai dhe familja e tij.
Por nuk e shpëton dot se pasurinë, ia merr vendimi i gjykatës. Dënimi i tij nuk do të jetë shumë i ashër. Me Saliun nuk ka të ardhme opozita.
Nuk ka të ardhme në Perëndim, në Moskë mund të ketë. Kjo është e vërteta që di Saliu po kërkon të shpëtojë ç’mund të shpëtojë duke mbajtur partinë.
Saliu indirekt thotë se do bëjmë revolucion e thotë në mënyrën e vetë si mosbindje civile. Pse nuk e pyesni njëherë çfarë kupton me mosbindje civile.
Mosbindja civile është revolucion, por ka frikë të thotë revolucion që me dhunë do rrëzojë një shtet, jashtë ligjit, jo me ligj.
E thotë mosbindje civile se ka frikë të thotë revolucion.
Ai do vazhdojë kështu deri sa ta shikoj të arsyeshme se mund të shpëtojë atë që mund të shpëtojë dhe të largohet.”
Ndërsa sa i takon partive të reja që kanë dalë në skenën politike thotë se e kanë të kot që lodhen, pasi skena politike është bipolare.
“Partitë e reja lodhen kot, se e ka provuar historia që gjithë sistemi është bipolar që nga Anglia në Amerikë dhe Shqipëria dy parti ka të majtën dhe të djathtën.
Kot lodhen të tjerët, nuk kanë fituar askund. Duhet të kapin polin.”
