Xherdan Shaqiri ka arritur të bëhet një prej futbollistëve kryesorë të Liverpoolit, dalëngadalë duke u futur në 11-shen startuese. Futbollisti kosovar, kaloi në verë te Liverpool për 13 milionë paund dhe aktualisht po shkëlqen te ‘Reds’.
Forma e lartë e Shaqirit kulmoi me dy golat dhe super paraqitjen e tij ndaj Manchester United, ku i vetëm 27-vjeçari mposhti ‘Djajtë e Kuq’.
Shaqiri përveç se është shndërruar në lojtar kyç për ekipin e Jurgen Klopp, po ashtu ka filluar të fitojë zemrat e tifozëve, duke u bërë njëri nga lojtarët më të pëlqyer të tifozëve të gjigantit anglez.
Deri tani në 18 ndeshje në Premierligë, futbollisti nga Gjilani ka gjithsej 13 paraqitje me të kuqtë, ku 6 herë është aktivizuar nga stoli dhe 7 herë ka qenë titullar.
Shaqiri me statistikat e tij, ka lënë në hije edhe Philippe Coutinhon, i cili u largua nga Liverpooli për të kaluar te Barcelona.
Në këtë sezon, Coutinho ka luajtur 15 ndeshje me Barcelonën ku ka shënuar 4 gola dhe një asist, ndërsa Shaqiri ka më shumë gola dhe asistime (5 gola, 2 asiste), në vetëm 13 ndeshje dhe i janë dashur 300 minuta më pak për ti arritur këto shifra.
