Trajneri i Kombëtares Shqiptare, Christian Panucci ka dalë sot në një konferencë për shtyp në prag të sfidave ndaj Spanjës dhe Italisë.
Gjatë fjalës së tij, Panucci i cilësoi këto dy ndeshje si mjaft të rëndësishme për imazhin e Shqipërisë, ndërsa tha se në fushën e lojës do 11 luanë:
“Nëse marrim rezultat, do të ishte shumë mirë për imazhin e Shqipërisë dhe do u jepte kënaqësi njerëzve. Këto skuadra kanë shumë lojtarë të zotë. Janë dy ekipe kombëtare shumë më të forta se ne, por futbolli na mëson se mund të bëjmë gjëra të rëndësishme edhe kur ke kundërshtarë të fortë. Këto janë ndeshje ku interesi dhe përqendrimi është shumë i madh. Dua 11 luanë në fushën e lojës. Duhet të bëjmë dy ndeshje plotë krenari dhe dëshirë.”
I pyetur mbi formacionet, trajneri tha se për ndeshjen ndaj Spanjës ende nuk e ka vendosur formacionin, por do të luajë ai që ka më shumë dëshirë.
I pyetur mbi rikthimin e Xhakës dhe Cikalleshit si dhe mungesa e lojtarëve nga Kategoria Superiore, italiani u shpreh:
“Për Xhakën dhe Cikalleshin nuk e kam thënë që nuk do të rikthehen në kombëtare. Xhaka e ka kuptuar gabimin dhe ka kërkuar ndjesë disa herë. Tani ai do të rikthehet me grupin për të dhënë kontributin. Cikalleshi nuk respektoi oraret prandaj e penalizova. Ata janë të dy futbollistë shumë të mirë. Besoj dhe kërkoj të na japin një dorë në ecurinë tonë.
Për sa i përket mungesës se lojtarëve nga Kategoria Superiore, dua të them se po i shoh të gjithë, por kam vendosur që në këto dy ndeshje historike të mbaj grupin e zakonshëm. Jam duke e ndjekur dhe Sabjen Lilajn e Skënderbeut, por për momentin siç e thash më lartë vendosa të marr grupin e zakonshëm.’’
