Mediat serbe kanë dhënë sot alarmin, teksa shkruajnë se një anije e mbushur me armë të llojeve të fundit, është nisur nga CIA drejt Shqipërisë, për t’u marrë nga Ushtria e Kosovës.
“Novosti” shkruan se kjo anije me armë është në rrugën e saj përtej Atlantikut dhe do të mbërrijë në portin e Durrësit.
Sipas gazetës, armët e rrezikshme do të merren në bazën e forcave të sigurisë së Kosovës. Sipas Novosti, duke iu referuar të dhënave të marra nga shërbimet serbe të sigurisë, ‘kjo marrëveshje e konspiracionit është pjesë e skenarit të Prishtinës për të marrë kontrollin e pjesës veriore të provincës’.
Gazeta shkon më tej teksa shkruan se shërbimi sekret i Kosovës ka shpërndarë pushkë automatike në pjesën jugore të Mitrovicës për disa prej bashkëpunëtorëve të mëparshëm dhe të tanishëm, si dhe personave të tjerë nga institucionet shtetërore, të cilët janë të trajnuar për t’i përdorur ato.
“Kjo lojë djallëzore, e udhëhequr nga Amerika, përshtatet me planet e qeverisë së Prishtinës, e cila synon që më 14 dhjetor, në kundërshtim me të gjitha marrëveshjet, të krijojë një ushtri të Kosovës”, shkruan gazeta.
Thuhet gjithashtu se ideja për vendosjen e taksave shtesë për mallrat nga Serbia qendrore, sipas “Novosti”, erdhi nga Uashingtoni.
“Ata, përmes Thaçit, propozuan futjen e tatimit, në mënyrë që të provokojnë Haradinajn të marrë masa më radikale”, tha burimi i paidentifikuar.
Siç shpjegohet nga gazeta, kjo do të provokonte reagimin e Beogradit dhe do të udhëhiqte në një konflikt në veriun e Kosovës.
Sipas gazetës, Prishtina ka për qëllim që, në rast të një përkeqësimi të mundshëm të situatës së sigurisë për shkak të rezistencës së serbëve, të kryejë një bllokadë të plotë të veriut të Kosovës dhe se me ndihmën e KFOR-it mbylli vendkalimet administrative Bërnjakut dhe Jarinjës.
Përveç kësaj, fletëpalosja pohon gjithashtu se KFOR-i, në rast se Beogradi ndalon furnizimin me ujë nga Gazivodi si një kundërmasë, merr në dorë këtë liqen strategjikisht të rëndësishëm në emër të tij.
“Kjo do të arrinte qëllimin – kontroll mbi tërë territorin e veriut të Kosovës”, përfundon “Novosti”./ Përshtati TIRANA TODAY
