Senatori Republikan i Shteteve të Bashkuara të Amerikës, John McCain është diagnostikuar me kancer në tru, sipas një njoftimi nga zyra e tij.
Kjo e fundit ka njoftuar gjithashtu se të premten e kaluar, mjekët i hoqën një mpiksje gjaku mbi syrin e tij të majtë.
Klinika që ka marrë përsipër trajtimin e senatorit, njoftoi se po shihet mundësia e kurimit të McCain nëpërmjet një kombinimi mes kimioterapisë dhe rrezatimit. Mjekët e senatorit amerikan thanë se ai po e merr veten në mënyrë të mahnitshme dhe se është shumë mirë.
Lajmi i diagnostikimit të McCain me kancer ka shkaktuar një “lumë” reagimesh, ndër të cilët edhe Barack Obama dhe Donald Trump.
“Senatori John McCain ka qenë gjithmonë një njeri luftarak. Mendimet dhe lutjet e mia dhe të Melanias shkojnë për senatorin McCain dhe familjen e tij. Shërim të shpejtë”, ka thënë Donald Trump.
Barack Obama shkroi në Twitter: “John McCain është një hero amerikan dhe një nga njerëzit më luftëtarë që kam njohur. Kanceri nuk e di me çfarë po përballet. Çoje në ferr, John.”
Mjaft prekës ka qenë edhe dedikimi i së bijës së senatorit, Meghan McCain, e cila ka shkruar se në këtë betejë, njeriu me besimin më të madh është pikërisht John McCain:
“Nuk është habi që në gjithë këtë, njeriu me më shumë besim dhe qetësi është pikërisht babai im. Ai është njeriu më i fortë që njoh. As armiku më i fortë nuk mundi ta thyente. Ai po përballet me këtë sfidë, sic është përballur me shumë të tjera. Kanceri mund ta pikëllojë atë në shumë mënyra: por nuk do e bëjë kurrë të dorëzohet. Asgjë nuk e ka bërë të dorëzohet.
Ai është një luftëtar, një nga amerikanët më të mëdhenj të kohës sonë dhe trashëgimtari i denjë i emrit të babait dhe gjyshit.
Por, për mua është diçka më tepër. Ai është forca ime, shembulli im, besimi im, mësuesi im, forca ime, heroi im – babai im.”
Senatori i Arizonës dhe kryetari i Komitetit të Shërbimeve të Armatosura po merr trajtimin mjekësor në shtëpinë e tij në Arizona./ Tirana Today
