Tashmë është zyrtare, Christopher Wray është në krye të FBI-së.
Ai u miratua me shumicë dërrmuese votash nga Senati amerikan, si shef i Byrosë Federale të Hetimeve.
Wray mori përsipër drejtimin e agjencisë me 92 vota pro dhe ka një karrierë të shquar si prokuror federal dhe një diplomë drejtësie nga Universiteti në Yale.
Wray zëvendëson James Comeyn, i cili u përjashtua nga presidenti Trump në muajin maj, teksa FBI po hetonte pretendimet se fushata e Trump kishte marrëveshje të fshehta me rusët në një përpjekje për të ndikuar në zgjedhjet e vitit 2016.
Sipas Trump, FBI nën drejtimin e Comeyt kishte probleme dhe se agjentët kishin humbur besimin e këtij të fundit, por vetë zyrtarët e FBI-së e mohuan këtë.
Ata pretendojnë se Trump e përjashtoi Comeyn, sepse ai nuk ishte i gatshëm të përmbushë dëshirën e presidentit për t’u tërhequr nga hetimet mbi përzierjen ruse.
Drejtorët e FBI-së emërohen për një mandat dhjetë vjeçar dhe prej tyre pritet të jenë objektiv dhe jo partiak.
