Avokatja Adriana Kalaja, e ftuar në një emision televiziv, analizoi zhvillimet e fundit lidhur me hetimet ndaj kryebashkiakut të Tiranës, Erion Veliaj. Ajo theksoi se, edhe pse SPAK mund të ketë në dispozicion prova të rëndësishme, jo të gjitha paraqiten në fazën e masave të sigurimit personal. Sipas Kalajës, organi i akuzës ka ngritur shqetësimin për veprimet e vazhdueshme të të pandehurit, përfshirë kërkimin e dëshmitarëve dhe kallëzuesve, veprime që sipas saj mund të ndikojnë negativisht në procesin hetimor.
Kalaja shtoi se provat e reja lidhen me presionet dhe shantazhet që i janë bërë prokurorit Olsi Dado, duke përfshirë edhe fyerje dhe intimidime të ndodhura në ambientet e gjykatës. Ajo paralajmëroi se ky është një shqetësim i madh për integritetin e hetimeve dhe të procesit gjyqësor, pasi Veliaj mund të ndërhyjë në prova, edhe nëse lihet në arrest shtëpie.
Avokatja nënvizoi se kjo është arsyeja kryesore që SPAK po këmbëngul për një masë më të rëndë sigurie, pasi ekziston rreziku që Veliaj të dëmtojë hetimin. Kalaja theksoi rëndësinë e vendimeve të ardhshme gjyqësore, duke shtuar se informatat që ajo disponon janë të pakonfirmuara, por që kërkesat e SPAK për masa sigurie janë të justifikuara.
