E ardhmja e Etrit Berishës është në diskutim, pasi Napoli mendon ti besojë portën në rast largimi të Pepe Reinas. Berisha ishte një ndër më meritorët me pritjet e tij në ndeshjen e Kupës së Italisë ku Atalanta eliminoi Napolin dhe kaloi në gjysmëfinale. Tani do të vijë një përballje tjetër mes tyre, në tregun e merkatos, ku napolitanët do të kërkojnë të përforcojnë ekipin me gardianin kuqezi.
Drejtuesit e klubit jugor, kanë krijuar bindjen se ish-portieri Lazios është pasuesi ideal i Pepe Reinas me spanjollin që ka një kontratë që skadon në qershor. Kjo nuk është hera e parë që prishtinaliu kërkohet nga skuadra ku luan dhe një tjetër lojtar kuqezi siç është Elseid Hysaj. Ekipi i drejtuar nga Maurizio Sarri tentoi të siguronte shërbimet e Berishës dhe sezonin e kaluar, por marrëveshja në fund nuk u arrit. Ndërkohë që këtë herë situata mund të marrë një tjetër rrjedhë.
