Deputeti i Partisë Demokratike, Ervin Salianji, foli sot për zhvillimet brenda kësaj force politike. Ai theksoi se kreu i Grupit Parlamentar i PD-së është Gazment Bardhi, pasi është zgjedhur nga shumica e deputetëve demokratëve.
Ai u shpreh në një intervistë në News24 se Kuvendi nuk ka nevojë që të njohë Bardhin si kreun e grupit, sepse nuk e zgjedhin ata por vullneti i deputetëve demokratë.
“Bardhi është kryetar i grupit, Açka është kryetare e komisionit të medias, ka qenë përherë, në këtë cilësi e kanë ftuar… këtu nuk ka lajm. Po merremi me një gjë që është botërisht e ditur. Nuk ka nevojë që Kuvendi të njohë Bardhin si kreun e grupit, sepse nuk e zgjedhin ata por vullneti i deputetëve të PD.
Do ta depozitojmë nesër edhe në mënyrë të shkruar, që kreu i grupit parlamentar i PD, është Bardhi. A e njohim Berishën si kreun e PD? Unë njoh që Berisha është personaliteti me më shumë vota në opozitë, faktor i pashmangshëm për ta bërë opozitën fituese përballë qeverisë. PD është e bashkuar”, tha ai.
I pyetur nëse Kuvendi njeh Flutura Açkën si kryetaren e grupit të PD, Salianji u shpreh se deputetja është kryetare e Komisionit të Medias.
“Ka disa gjëra që edhe logjika nuk i mban dot. Nëse krijon një grup të ri parlamentar me 7 deputetë, me një emër tjetër, atëherë është në rregull. Nuk e kam me zonjën Açka sepse kam respekt, por e kam me Bashën që krijon këto letra”, shtoi Salianji.
