Me nisjen e sesionit të ri parlamentar, përçarja e Partisë Demokratike mund të jetë edhe më e thellë. Në konferencën e përjavshme me gazetarët, Sali Berisha ka paralajmëruar ndarjen e deputetëve të Rithemelimit nga grupi zyrtar i PD-së në Parlament.
“PD do të ketë grupin e saj Parlamentar në Kuvend në fillim të sesionit, cili do jetë kryetar do të varet nga deputetët, por do të ketë grupin e vetë”, tha Berisha në konferencën për median.
Aktualisht janë 8 deputetë që i janë bashkuar Sali Berishës dhe përjashtuar nga grupi i PD-së. Ndërsa një pjesë tjetër e deputetëve të Rithemelimit, figurojnë në Kuvend si deputetë të PD-së zyrtare.
Janë 8 deputetë të dalë nga listat e PD-së në zgjedhjet Parlamentare pa grup parlamentar, për shkak të përjashtimeve, mes tyre Sali Berisha, Flamur Noka, Albana Vokshi, Edmond Spaho, Luan Baçi, Tritan Shehu, Oerd Bylykbashi dhe Agron Shehaj. Por Berisha ka më shumë se kaq deputetë me vete. Janë 20 deputetë demokratë të cilët e ndjekin atë në mbledhjet e zakonshme partiake. Gjithashtu janë pozicionuar me të në debatet parlamentare.
