Ai është kthyer në një prej kandidatëve potencial për të fituar “Topin e Artë” këtë sezon, por kjo gjë nuk e ka ndaluar të vazhdojë me veprimet e tij humanitare. Mohamed Salah, ylli i kombëtares egjiptiane dhe i Liverpoolit, ka mundësuar ndërtimin e një impianti për kullimin e ujit, për fshatin ku ai është rritur dhe disa zona aty afër për ti furnizuar me ujë të pastër e cila do të ketë një kosto prej 450 mijë dollarë. Babai i Salahut tha se toka ishte siguruar tashmë dhe ndodhet në fshatin Sharbatu, në guvernatorin e Gharbia.
Guvernatori i Gharbia, Ahmed Deif Sakr tha se dhurimi nuk është një gjë e re për Salah, pasi lojtari ka bërë gjithmonë donacione bujare për egjiptianët në përgjithësi dhe banorëve të fshatit të tij në veçanti. “Salah është një model që duhet ndjekur nga të rinjtë dhe ai tashmë është i dashur nga miliona njerëz anembanë botës, sepse ai sjell lumturinë në fytyrat e tyre. Ai është gjithashtu ambasadori më i mirë në Egjipt në botë për promovimin e turizmit,” tha Sakr.
Sakr shtoi se kishte kontaktuar babain e Salahut dhe ata kishin zgjedhur copën e tokës dhe nënshkruan kontratën. Babai i tij i ka paguar paratë pronarit të tokës për t’u shitur nën emrin e kreut të ndërmarrjes së ujit të pijshëm dhe kanalizimeve.
Mbreti egjiptian, siç është quajtur zakonisht nga tifozët e tij, ka një histori të gjatë të donacioneve të mëdha për vendin e tij në fshehtësi dhe publikisht. Në dhjetor 2017, Salah dhuroi 30,000 euro për Shoqatën e Lojtarëve Veteranë në Egjipt, në të cilën njëqind e njëzet familje në Egjipt morën një pagë mujore nga shoqata.
