Bomberi i kombëtares shqiptare, Armando Sadiku është larguar nga kampionati spanjoll. Pas një dëmtimi të rëndë që e mbajti gjatë jashtë fushave, sulmuesi elbasanas është gati të rikthehet në fushën e blertë, por të Levante e ka humbur vendin e titullarit, kështu që i duhej të gjente një skuadër të re.
Sadiku ka kaluar me sukses testet fizike këtë të hënë në praninë e mjekëve të klubit të tij, Levantes, duke u transferohet në formë huazimi tek ekipi zviceran, Lugano deri në fund të sezonit, me të drejtën e blerjes së kartonit.
Presidenti i Luganos, Enzo Renzetti, u shpreh i lumtur për këtë marrëveshje, duke qenë i bindur se pavarësisht se vjen nga një dëmtim i rëndë, Sadiku mbetet më i fortë se të gjithë sulmuesit që ka aktualisht në skuadrën e tij.
“Problemi i vetëm është se Sadiku nuk ka zhvilluar ndeshje zyrtare në këtë sezon. Gjithsesi, kam folur personalisht me djalin. Është shumë i motivuar dhe po pret me padurim që të na bashkohet.” Kanë mbetur vetëm disa detaje të vogla për t’u përcaktuar, më pas Sadiku do të zyrtarizohet te Lugano.
