Ministria e Jashtme ruse ka reaguar lidhur me deklaratat e fundit të kryeministrit Edi Rama, se nëse BE i mbyll derën Shqipërisë dhe Kosovës, atëherë të dyja vendet do të bashkohen me njëra-tjetrën.
Përmes një njoftimi për shtyp, Ministria e Jashtme ruse thekson se “një seri deklaratash të kohëve të fundit, të politikanëve të ndryshëm shqiptarë kanë ngritur një shqetësim të madh lidhur me rihapjen e kufijve në Ballkan”.
Sipas Ministrisë së Jashtme ruse, Shqipëria po bën përpjekje për të realizuar projektin e “Shqipërisë së Madhe”, gjë e cila, sipas Rusisë, rrit potencialisht konfliktin në rajonin e Ballkanit.
“Po bëhen përpjekje për të zbatuar projektin e Shqipërisë së Madhe, bazuar në kushtetutën shqiptare, e cila i jep Tiranës të drejtën për të mbrojtur interesat e shqiptarëve jashtë vendit. Nën maskën e bisedimeve hipokrite për nevojën për të stabilizuar rajonin, nën ombrellën e NATO-s, themelet e stabilitetit po tronditen; një kurs i ri politik është miratuar për të ripërkufizuar kufijtë në Ballkan, gjë e cila rrit në mënyrë të pashmangshme dhe potenciale konfliktin”, shkruhet në njoftimin për shtyp.
Sipas njoftimit të Ministrisë së Jashtme ruse, nxitja e bashkimit të shqiptarëve në një shtet të vetëm, vjen jo vetëm nga kryeministri shqiptar Edi Rama, por edhe nga presidenti i Kosovës, Hashim Thaçi, si dhe nga kreu i komunës jugore të Luginës së Preshevës, Jonuz Musliu.
Ministria e Jashtme ruse shkruan se “(…) pjesë e të njëjtit kontekst është edhe Platforma e njohur e Tiranës që është miratuar nga partitë etnike shqiptare në Maqedoni, gjë e cila po minon shtetësinë e saj”.
Rusia ka edhe një mesazh për diplomatët e Shteteve të Bashkuara dhe Bashkimit Evropian të Tiranës dhe Prishtinës, sipas së cilës, nuk reagojnë por japin vetëm deklarata pa kuptim.
“Partnerët kryesorë të Tiranës dhe Prishtinës, Shtetet e Bashkuara dhe BE, në të tilla raste ose heshtin, ose lëshojnë shprehje të zakonshme e të pakuptimta”.
Njoftimi për shtyp i Ministrisë së Jashtme ruse:
