“Rusia po prodhon një bombë bërthamore të aftë të shkaktojë cunami vdekjeprurës 300ft (91 metër) të lartë, që mund të shkatërrojë qytete bregdetare të SHBA-së, si Los Anxheles dhe San Diego”, tha një burim i industrisë ruse të armatimit. Lajmi vjen menjëherë pas deklarimit luftarak të presidentit Vladimir Putin, i cili gjatë javës së fundit zbuloi edhe planet për vendosjen e raketave të frikshme hipersonike ruse.
Putin konfirmoi zhvillimin e silurëve autonomë strategjikë “Poseidon” gjatë fjalimit të tij në të dy dhomat e parlamentit rus në mars – dhe një burim i industrisë ruse të mbrojtjes tha për agjencinë shtetërore të lajmeve “Tass” që testet nënujore tashmë kishin filluar. “Testimet e silurëve bërthamorë “Posedon” janë duke u bërë në një zonë të detit, të mbrojtur nga mjetet e zbulimit të një armiku potencial”.
Ai tha se siluri është e aftë të mbajë një raketë nukleare 2 megatonesh e destinuar për të shkatërruar bazat detare të armikut.
Sipas të njëjtit burim, ushtria ruse po përdor një nga nëndetëset e saj bërthamore për testimet në det. Gjithçka duket edhe e vërtetë edhe e frikshme, ndërkohë ka vetëm një paqartësi. Raporti nuk qartëson vitin e dorëzimit të armës dhe ka të ngjarë që ajo të mos jetë gati dhe efektive për një kohë të gjatë.
Duke folur për “Business Insider”, pas konfirmimit fillestar të z. Putin, Rex Richardson, një fizikant që hulumton armët bërthamore, tha: “Një armë e tillë bërthamore, e vendosur pranë bregdetit, mund të sigurojë energji të mjaftueshme për të barazuar cunamin e vitit 2011, dhe ndoshta shumë më tepër”.
Duhet kujtuar se cunami i vitit 2011 në Japoni vrau më shumë se 15 000 njerëz dhe shkaktoi dëmtime masive në infrastrukturën e vendit.
Ai shtoi: “Duke përfituar nga fakti se ngritja e tabanit të nëndetit e amplifikon efektin, valët e cunamit në lartësinë 100 metra janë të mundura”.
Richardson tha se një shpërthim i tillë pranë bregut mund të thithë edhe tonelata të sedimenteve të oqeanit e ta rrezatojë atë mbi zonat e afërta – duke krijuar pasoja shkatërruese radioaktive.
Ai shtoi: “Los Anxhelos ose San Diego do të ishin veçanërisht të prekshme nga pasojat e shpërthimit edhe për shkak të rrymave detare”.
Duke folur për këtë armë Putin u mburr duke detajuar se siluri autonom lëvizte më shpejt se një nëndetëse apo anije.
“Nuk kanë ndonjë dobësi që armiku mund ta shfrytëzojë dhe kanë kapacitet të madh bërthamor”, raportoi Business Insider.
Po sipas Richardson: “Siluri nënujor i telekomanduar mund të mbajnë bërthama konvencionale ose bërthamore, gjë që u mundëson rusëve të godasin objektivë të ndryshëm, duke përfshirë fortifikimet bregdetare dhe infrastrukturën”. TIRANA TODAY
