Sekretari amerikan i Shtetit, Marco Rubio, bëri sot thirrje për hartimin e një “Plani B” për rihapjen e Ngushticës së Hormuzit, gjatë një takimi të ministrave të Jashtëm të NATO-s në Suedi.
“Ne të gjithë do të dëshironim të shihnim një marrëveshje me Iranin që garanton hapjen e ngushticës”, tha Rubio. “Por duhet të kemi edhe një ‘Plan B’. Çfarë ndodh nëse Irani refuzon ta hapë atë? Çfarë ndodh nëse vendos ta kontrollojë ngushticën dhe të vendosë tarifa kalimi? Në atë rast, diçka duhet bërë”.
Rubio tha se e kishte ngritur këtë çështje gjatë diskutimeve në NATO dhe se kishte marrë mbështetje të gjerë nga aleatët.
“E ngrita këtë pikë sot. Pashë shumë miratim dhe shumë kolegë më thanë më pas se pajtoheshin me të, por sot nuk kemi ndonjë njoftim konkret për masa të reja”, deklaroi ai para gazetarëve.
Kryediplomati amerikan theksoi se një koalicion ndërkombëtar i udhëhequr nga Franca dhe Britania e Madhe po përgatit tashmë një mision të mundshëm detar për të garantuar lirinë e lundrimit në Ngushticën e Hormuzit nëse arrihet një marrëveshje për përfundimin e luftës.
“Por duhet të kemi një ‘Plan B’ nëse vazhdojnë sulmet. Si do ta rihapni ngushticën? Nuk e di nëse kjo do të ishte domosdoshmërisht një mision i NATO-s, por sigurisht do të përfshinte vende anëtare të NATO-s që mund të kontribuojnë”, tha ai.
Me çmimet e energjisë në rritje në mbarë botën, rihapja e ngushticës së Hormuzit është bërë një nga çështjet kryesore në negociatat e bllokuara mes Shteteve të Bashkuara të Amerikës dhe Iranit.
Që nga fillimi i luftës mes SHBA-së, Izraelit dhe Iranit rreth tre muaj më parë, Teherani ka penguar në masë të madhe kalimin në këtë korridor strategjik për transportin e naftës dhe gazit përmes kërcënimeve dhe sulmeve ndaj cisternave dhe anijeve tregtare. Si kundërpërgjigje, SHBA ka vendosur bllokadën e saj ndaj anijeve që hyjnë ose dalin nga portet iraniane.
