Mediat ruse vazhdojnë t’i bëjnë jehonë politikës serbe. Këtë radhë është “Russia Today”, e cila shkruan se Serbia paralajmëron një luftë të re në Ballkan, nëse Kosova bashkohet me Shqipërinë.
“Një zyrtar i qeverisë serbe kërcënoi se një luftë tjetër mund të shpërthejë në Ballkan, nëse Shqipëria përpiqet të bashkohet me Kosovën, duke i kërkuar Perëndimit që të denoncojë projektin e shqiptarëve”, shkruan Russia Today.
Duke iu referuar deklaratave të kryeministrit Rama, sipas të cilit nëse BE ndalon zgjerimin, Shqipërisë dhe Kosovës i mbeten të bashkohen me njëra-tjetrën, “Russia Today” evidenton deklaratën e kryeministrit serb, Aleksandar Vuçiç, i cili tha pak ditë më parë: “Nëse do të thosha që të gjithë serbët të jetojnë në një shtet do të mbahesha në një shtizë flamuri në Bruksel,”
Po ashtu duke iu përgjigjur deklaratës së kryeministrit Rama, edhe ministri i qeverisë serbe, Aleksandër Vulin tha se pret që NATO dhe Bashkimi Evropian të reagojnë mbi deklarata të tilla, pasi një luftë tjetër mund të shpërthejë në Ballkan. Sipas Vulin, në këtë luftë të re do të përfshiheshin Maqedonia dhe Mali i Zi, vende që kanë në përqindjen e tyre popullsi etnike shqiptare.
“Serbia i druhet një bashkimi të Kosovës me Shqipërinë, sidomos nga frika e një lufte tjetër si ajo lufta e përgjakshme etnike e viteve 1990, nga e cila u shqye Jugosllavia. Në vitin 1999, NATO bombardoi Jugosllavinë në përgjigje ndaj asaj që Aleanca e Atlantikut të Veriut e cilësoi spastrim etnik i popullatës myslimane të Kosovës”, shkruan “Russia Today”.
Tirana Today
