Drejtori i Përgjithshëm i Policisë së Shtetit, Muhamet Rrumbullaku ka zhvilluar një takim me Drejtorin e Përgjithshëm të Doganave, Genti Gazheli dhe me Drejtorin e Përgjithshëm të Autoriteti Portual, Pirro Vengu.
Ky takim u mbajt në kuadër të punës intensive që po kryejnë strukturat e Policisë së Shtetit dhe ato mbështetëse, për menaxhimin e pikut të sezonit turistik 2023 dhe fluksin e turistëve që zgjedhin vendin tonë.
Gjithashtu, në këtë takim u diskutua dhe lufta kundër trafikimit të lëndëvë narkotike, trafikimit të armëve, mallrat kontrabanë, dhe kalimit të shumave të konsiderueshe të parave që kanë si burim krimin. U diskutua për përpunimin e shpejtë dhe të saktë të të dhënave të shtetasve dhe mjetet me të cilat ata lëvizin, në mënyrë që të lehtësohet lëvizja dhe minimizimi i kostos kohore.
Gjatë diskutimit, Drejtori i Përgjithshëm vlerësoi bashkëpunimin e deritanishëm ndërmjet 3 institucioneve, dhe theksoi se menaxhimi shumë i mirë i lëvizjes së shumëfishuar gjatë sezonit turistik 2023, pa incidente dhe me rezultate konkrete, dëshmon një angazhim paralel dhe maksimal të të gjithëve, duke qenë se pikat e kalimit kufitar përbëjnë një hallkë të rëndësishme të sigurisë publike.
Në vijim të takimit, drejtuesit e 2 autoriteteve, Vengu dhe Gazheli, gjithashtu vlerësuan koordinimin e punës me punonjësit e Policisë në pikat e kalimit kufitar dhe rezultatet e arrira nga inteligjenca policore. U bë me dije se bashkëveprimi ndërmjet 3 institucioneve ka përfshirë kontrolle me metoda bashkëkohore, shkëmbim të informacioneve dhe ndërhyrje të përbashkëta.
Të gjitha këto elemente kanë sjellë rezultate të shkëlqyera në luftën kundër krimeve kufitare, si dhe kanë mundësuar qarkullimin e lirë dhe të sigurtë të shtetasve, mallrave dhe shërbimeve.
