Rama ka forcuar radhët e kësaj force, duke i marrë dy deputete Shpëtim Idrizit. Lajmi është konfirmuar gjatë paradites së sotme nga Reme Lala.
Dy gratë e PDIU-së, të cilat morën mandatin e deputetit në Dibër dhe Elbasan, Reme Lala dhe Elena Xhina, nga sot janë pjesë e Partisë Socialiste.
Reme Lala zbuloi këtë lajm teksa ndodhej në Dibër së bashku me Ramën, për të nisur punimet e Rrugës së Arbrit. Ajo ka thënë gjatë fjalës së saj se do të bashkohet me më të mirët, sikundër i ka cilësuar deputetët e kësaj force.
“Unë dua të bashkohem me më të mirët, me Olta Xhaçkën dhe Lindita Nikollën. Dua të bashkohem me PS, se nuk jemi më të mirët, por më të mirë nuk kemi parë”, tha Reme Lala sot në Dibër.
Ajo nuk u ndal me kaq, por tha se në këtë ceremoni është e pranishme edhe Elena Xhina, deputetja çame e Elbasanit, e cila ka vendosur ti bashkohet Partisë Socialiste.
Xhina zuri vendin e Bujar Muçës, pasi ky i fundit u detyrua të lërë mandatin.
Deputetja çame, Reme Lala e falenderoi Ramën për premtimin e mbajtur për Rrugën e Arbrit. Po kështu ajo nuk nguroi që edhe të thurte lavde ndaj kryeministrit Rama, duke i dëshmuar mirënjohjen se i ka shpëtuar mandatin.
“Gjithmonë zemrën peshë ke për të na e mbajtur me këto surpriza zoti Kryeministër. Kjo është rruga e ëndrrës së çdo dibrani. Gëzimi i madh sot edhe për Dibrën e Madhe, ne këtej dhe vëllezërit e motrat tona andej kufirit.
Në këtë shesh ku jemi sot, në çdo fushatë të çdo partie, Rruga e Arbrit ka qenë kryefjala e premtimeve dhe pas çdo zgjedhjeve, kryefjala e zhgënjimeve. Faleminderit Edi Rama se ma shpëtove mandatin. Bravo të qoftë se përsa i përket Dibrës, i shpëtove nderin politikës, qeverisë dhe vetes”, tha Reme Lala.
