Pas vendimit të kryeministrit për pezullimin e dyfishimit të pagës së tij, është edhe infermierja që ka marr një vendim tjetër. Arta Sejdiu, kryeinfermiere në Klinikën e Pulmologjisë në QKUK, ka pezulluar vendimin për t’ia falur rrogën e saj kryeministrit.
“Pas qëndrimit të Kryeministrit që ta pezulloje vendimin për rritjen e pagës, edhe unë po e pezulloj vendimin që t’ia jap pagën”, ka deklaruar Sejdiu.
Kryeministri Haradinaj mori këtë vendim pasi Agjencia Kundër Korrupsionit e shpalli të paligjshëm rritjen e rrogave.
“Të dy e kemi një pozitë që fillon me KRYE, KRYE – Minister dhe KRYE – Infermiere, andaj edhe e kemi mendu këtë çështje me KRY (kokë). Vendim shumë mençur nga të dy ne, njëherë i bijmë pishman, mandej e pezullojmë, e në fund e anulojmë”, ka thënë ajo.
Pasi kryeministri mori vendim për dyfishimin e pagës së tij dhe rritjen për stafin e Qeverisë, infermierja Sejdiu publikisht tha se do t’ia falë rrogën Haradinajt. Reagimi ironik i infermieres erdhi pasi kreu i Qeverisë tha se rritja e rrogës, shërben si shenjë për t’u larguar nga korrupsioni.
