Me fillimin e stinës së vjeshtës, urgjenca e Spitalit Rajonal të Elbasanit po përballet çdo ditë me një fluks të shtuar pacientësh të prekur nga virozat e stinës. Më shumë se 200 qytetarë paraqiten çdo ditë për ndihmë mjekësore, shumica me simptoma të gripit dhe ftohjeve të ndryshme.
Sipas mjekëve të urgjencës, kthimi i fëmijëve dhe të rinjve në shkolla ka ndikuar dukshëm në përhapjen e këtyre infeksioneve respiratore.
Ergys Mici, shef i shërbimit të Urgjencës në Spitalin e Elbasanit, shprehet:
“Kemi një rritje të konsiderueshme të rasteve me viroza tipike të stinës, si dhe disa raste me Covid-19.
Megjithatë, situata mbetet e menaxhueshme dhe nuk ka vend për panik.”
Paralelisht me virozat sezonale, është vënë re edhe një shtim i lehtë i rasteve me Covid-19, por sipas mjekëve, këto raste nuk janë të rënda dhe trajtohen në kushte ambulatore.
Specialistët e shëndetësisë theksojnë se vaksinimi kundër gripit mbetet një nga masat më efektive të mbrojtjes, veçanërisht për personat që vuajnë nga sëmundje kronike, të cilët janë më të rrezikuarit nga komplikacionet që mund të sjellin virozat.
Specialistë të shëndetësisë theksojnë se
“Vaksinimi është mënyra më e mirë për të parandaluar komplikacionet e gripit, sidomos për grupet më të ndjeshme si të moshuarit, fëmijët e vegjël dhe ata me sëmundje kronike.”
Mjekët apelojnë gjithashtu që qytetarët të mos i neglizhojnë simptomat e para të gripit, si temperatura, kolla apo dhimbjet muskulore, pasi neglizhenca mund të çojë në komplikacione të rënda dhe përhapje të mëtejshme të infeksioneve.
“Mos i neglizhoni simptomat apelojnë mjekët. Trajtimi në kohë është çelësi për të shmangur problemet më serioze shëndetësore”.
