Ushtria kineze ka dërguar 150.000 trupa në kufirin me Korenë e Veriut për t’u përgatitur për sulme të mundshme, pas bombardimeve që kryen Shtetet e Bashkuara mbi Sirinë.
Trupat janë dërguar për t’u përgatitur ndaj “rrethanave të paparashikuara”, si dhe për të parandaluar sulmet e mundshme nga Koreja e Veriut.
Sulmi i urdhëruar nga Presidenti amerikan Donald Trump mbi Sirinë është interpretuar si një kërcënim për Korenë e Veriut. Dhe tani Kina ka dërguar ekipe mjekësore dhe rezervistët nga Ushtria Çlirimtare Popullore, shkruan Daily Mail.
Ndërkohë, një aeroplanmbajtëse amerikane është zhvendosur në Singapor për të qenë në gatishmëri, pasi Koreja e Veriut po kryen testimin e shumë raketave bërthamore.
Koreja e Veriut mendohet të kryejë teste bërthamore me rastin e 105-vjetorit të lindjes së liderit të saj themelues.
Përfaqësuesi Special i Kinës për Punët e Gadishullit, Wu Dawei u takua me homologun e tij të Koresë së Jugut, të hënën, për të diskutuar mbi çështjet bërthamore.
Ndërkaq, këshilltari i Sigurisë Kombëtare amerikane HR McMaster ka kritikuar Korenë e Veriut si një komb mashtrues dhe provokues”, ndërsa tha se denuklearizimi i Koresë së Veriut duhet të bëhet patjetër. “Presidenti ka kërkuar që të merren parasysh të gjitha opsionet për të evituar kërcënimin që vjen nga Koreja e Veriut”, tha ai në Fox News.
Seuli dhe Uashingtoni janë duke kryer stërvitje të përbashkëta ushtarake, stërvitje të cilat shihen nga Koreja e Veriu si një parapërgatitje për luftë.
Pheniani kërkon të zhvillojë një raketë bërthamore me rreze të gjatë, e aftë për të goditur kontinentin amerikan, dhe deri tani ka organizuar pesë teste bërthamore, dy prej tyre vitin e kaluar.
Analizat e nxjerra nga imazhet satelitore sugjerojnë se Koreja e Veriut është duke u përgatitur për të kryer testin e gjashtë bërthamor. Ndërsa agjentët e zbulimit amerikan paralajmërojnë se Pheniani mund të jetë dy vjet larg realizimit të qëllimit të tij madhor.
Tirana Today
