Një gjykatës federal në Nju Jork ka rrëzuar padinë e aktorit Justin Baldoni për shpifje prej 400 milionë dollarësh kundër Blake Lively.
Dyshja u takuan në filmin “It Ends With Us”, por marrëdhënia mes tyre u tensionua shpejt pas akuzave të Lively për ngacmim seksual në ambientet e xhirimeve. Ajo ngriti një padi ndaj Baldonit dhe kompanisë së tij prodhuese, Wayfarer Studios, në dhjetor të vitit të kaluar.
Pasi padia u bë publike dhe u shoqërua nga një artikull në New York Times, Baldoni reagoi me një kundërpadi ndaj Lively, bashkëshortit të saj Ryan Reynolds, publicistes Leslie Sloane dhe vetë gazetës, duke pretenduar shpifje dhe tentativë për shkatërrim të karrierës së tij.
Por gjykatësi Lewis Liman vendosi këtë javë se pretendimet e Baldonit nuk kishin baza të mjaftueshme ligjore dhe se deklaratat e Lively në padi ishin të mbrojtura.
Në vendimin e tij, gjykatësi vlerësoi gjithashtu se gazeta New York Times kishte vepruar në përputhje me standardet gazetareske, duke mos gjetur prova për “keqdashje të qëllimshme” në raportim.
Në një reagim publik, Blake Lively falënderoi drejtësinë dhe theksoi se “shumë gra nuk kanë burimet për t’u përballur me padi hakmarrëse”.
Ndërkohë, Baldoni ka afat deri më 23 qershor për të ndryshuar dhe riparaqitur disa nga pretendimet e tij.
Filmi “It Ends With Us”, i bazuar në romanin bestseller të Colleen Hoover, do të shfaqet në kinema më vonë këtë vit, por duket se drama e vërtetë ka ndodhur jashtë ekranit.
