Një investim i ndërprerë në Porto Romano të Durrësit ka vënë në rrezik banorët e zonës, ku rrëshqitjet e tokës dhe dëmtimi i argjinaturës së kanalit të ujërave të larta kërcënojnë shtëpitë dhe bizneset. Banorët e kësaj lagjeje janë shqetësuar për sigurinë e tyre, duke kërkuar ndërhyrje urgjente nga bashkia.
Sipas tyre, problemi ka nisur pas ndërprerjes së punimeve për ndërtimin e një lulishteje mbi kanalin e ujërave të larta. Punimet janë ndërprerë për shkak të mungesës së fondeve dhe për shkak të keqmenaxhimit nga firma dhe autoritetet që miratuan fondet. Ata thonë se kanali është thelluar për 4 metra, një veprim që sipas banorëve ishte i panevojshëm dhe ka sjellë probleme të mëdha, përfshirë rrëshqitjet e tokës që po rrezikojnë jetesën e tyre.
Pas reshjeve të fundit, situata është përkeqësuar, duke e bërë çdo ditë më të rrezikshme për banorët. Ata po kërkojnë një zgjidhje të shpejtë dhe një angazhim të plotë nga autoritetet për të parandaluar një katastrofë. Pavarësisht vizitave nga përfaqësues të bashkisë, banorët thonë se ata nuk kanë marrë përgjigje të qarta dhe po ndihen të lënë pas dore.
