Ish-trajneri i Kombëtares Shqiptare, Gianni De Biasi është rrëfyer në një intervistë lidhur me vitet që kaloi nën drejtimin e ekipit kuq e zi.
Teksa ishte i ftuar në “Top Story”, De Biasi tha se kujtonte çdo moment, që nga dita e parë e mbërritjes në Shqipëri:
“Unë jam një elefant, kujtoj gjithçka. Kujtoj ditën e parë që kam ardhur këtu, shumë situata të bukura dhe të këqija, situata të vështira. Ajo që kujtoj është fakti që këto 5 vite ikën menjëherë. Unë kam ardhur këtu pesë vite e gjysmë më parë dhe vendosa unë që ta mbyll, sepse mendova që u mbyll rrugëtimi dhe dua ta lë duke ruajtur një kujtim shumë të bukur. Shpresa ime mbetet që kjo është tokë e jashtëzakonshme dhe në një të nesërme mund të na kryqëzojë sërish rrugët.”
Gjithashtu, italiani foli për momentin se kur kishte vendosur që të dorëhiqej, fill pas ndeshjes me Izraelin, duke thënë se pas humbjes me Luksemburgun në miqësore, ai i kishte “masakruar” lojtarët:
“Mendoj se bëra një akt bujarie dhe përgjegjshmëria për Federatën dhe tifozët. Kisha mbërritur në një pikë pas humbjes me Luksemburgun dhe vendosa që duhej të ikja. Ishte një ndeshje që duhet ta fitonim të paktën 4-0 dhe jo ta humbisnim 2-1. Aty kam “masakruar” lojtarët dhe kanë kaluar një javë të tmerrshme dhe kjo u pa në fitoren me Izraelin. E kisha vendosur para ndeshjes me Izraelin dhe mendova që nëse vjen një trajner tjetër, lojtarët do të kishin arsye të reja për t’u bashkuar më shumë. Megjithatë, është e njëjta dritare. Unë them të njëjtat gjëra, të punosh psikologjikisht me lojtarët. Për këtë i dhashë mundësinë trajnerit të ri që me ndeshjet e mbetura në shtator dhe tetor, federatës që të sjellë një trajner të ri që të njohë lojtarët dhe të planifikojë eliminatoret e ardhshme, sepse unë mendoj që Shqipëria duhet të shkojë në finalet e europianit 2020 dhe nëse projekti nis që tani, mund të shkojë”, tha De Biassi.
Sa i përket të ardhmes së tij si trajner, ai pohoi faktin se mund ta vijonte karrierën në Arabi, pasi kishte një ofertë nga ky vend, ndërkohë që nuk preferoi të jepte emra të pëlqyerish prej tij, për të qenë pasues në pankinën shqiptare.
