Kryefjala e mediave ndërkombëtare në ditën e sotme ka qenë largimi i Cristiano Ronaldos nga Real Madrid drejt Juventusit. “Marca” shkruan se ka shumë faktorë që e bëjnë të besueshëm këtë skenar dhe se ylli portugez në radhë të parë nuk ka qenë i kënaqur me publikun në Bernabeu.
Një premtim i pa mbajtur nga presidenti Florentino Perez pasi madrilenët fituan Champions Leaguen ku përballë kishin Juventusin ka bërë shumë bujë. Ai i kishte premtuar Ronaldos se do ti përmirësonte kushtet financiare, gjë që nuk e bëri. Pavarësisht se ditët e fundit ata i ofruan një rinovim, portugezi mendon se ishte shumë vonë dhe e ka refuzuar.
Një motiv tjetër është ylli brazilian, Neymar. Pak para se Ronaldo të fitonte ‘Topin e Artë’, Perez u shpreh ‘Nëse Neymar dëshiron ta fitojë le të vijë në Madrid’. Edhe pse kishte në ekip yllin portugez fiksimi i tij ishte Neymar. Sipas ‘AS’ në klub do të fillojë një sërë blerjesh pasi Perez ka dy emra të cilët do të bënin që të harrohej Cristian Ronaldo në Real Madrid, Neymar dhe Mbappe.
Cristiano Ronaldo, nëse e lë Real Madridin, e di se do të largohet nga një qytet, ku edhe ai dhe familja e tij janë të kënaqur. Futbollisti portugez ka qenë shumë i lumtur me jetën në kryeqytetin spanjoll, duke shijuar mundësitë e mëdha që i ofron Madridi, një orë e gjysmë me aeroplan nga shtëpia e tij në Portugali.
Pikërisht në këtë të fundit, ai është takuar me gruan, që është partnerja aktuale, dhe me njerëzit e afërt, pas eliminimit nga Botërori i Rusisë. Por, Cristiano tashmë mendon në italisht. Dhe po kërkon një shtëpi në Torino. 
Futbollisti portugez i ka kaluar dy javët e fundit duke parë mundësitë për të vendosur akomodimin e tij në Torino. Pra, po kërkon shtëpi atje. Nuk është një qytet aq i ngrohtë, sa Madridi. Dimri është i vështirë në shpatet e Alpeve.
