Cristiano Ronaldo u dënua dy ditë më parë nga një gjykatë spanjolle me 19 milionë euro gjobë, për evazion fiskal. Ai kishte shmangur taksat gjatë kohës që ishte te Real Madrid, duke regjistruar të drejtat e imazhit në disa kompani fantazmë jashtë vendit.
Qeveria spanjolle është kritikuar nga ekspertët për faktin se u tregua më e butë në dënimin e Cristiano Ronaldos për evazion fiskal në krahasim me dënimin që i dha Lionel Messit për të njëjtën shkelje ligji.
Ylli i Juventusit pranoi shmangien e taksave para një gjykate në Madrid dhe u gjobit me 18,8 milionë euro pas një marrëveshjeje me prokurorët.
Dënimi i mëtejshëm me burg iu shndërrua sërish në gjobë dhe ekspertët e departamentit të Thesarit në Spanjë thonë se gjoba mund të ishte 6 herë më e madhe, pasi evazioni i Ronaldos ishte më i rëndë se ai i Messit.
“Ndryshimi i Kodit Penal e konsideron atë të Ronaldos shkelje të rëndë, ndërsa ajo e Messit quhej shkelje fiskale”, thanë ekspertët për gazetën “El Mundo”.
