Roma është kthyer tek fitorja ndaj SPAL, duke fituar me lehtësi me rezultatin 3-1 në ‘Olimpico”. Ndeshja u bë më lehtë për romanët pasi mbrojtësi i ekipit mik Felipe u ndëshkua me karton të kuq që në minutën e 9’. Verdhekuqtë vinin në këtë takim pas barazimit 1-1 në transfertën me Genoan dhe u hodhën menjëherë në sulm, në kërkim të fitores.
Mbrojtësi brazilian Felipe shkaktoi faull ndaj Dzekos, duke qenë lojtari i fundit dhe pasi u konsultua me VAR-in, gjyqtari akordoi kartonin e kuq ndaj tij. Ishte pikërisht boshnjaku që gjeti rrugën e rrjetës në minutën e 19’, pasi shfrytëzoi mjaft mirë një asist të El Shaaraëy-it. Skuadra e Di Francescos arriti të dyfishojë rezultatin në minutën e 32’ dhe këtë herë autor ishte holandezi, Kevin Strootman, që përfitoi mjaft mirë pas një rrëmuje në zonën e SPAL-it. Me epërsinë numerike dhe me avantazhin e 2 golave, verdhekuqve u duhet vetëm të menaxhojnë rezultatin, për të shtuar edhe 3 pikë në tabelën e renditjes.
Në pjesën e dytë, ishte pikërisht mesfushori i ardhur këtë verë, Pellegrini, që shënoi golin e 3-të për Romën, pas një krosimi të mbrojtësit Kolarov. Vetëm 2 minuta më pas, SPAL fitoi një 11-metërsh, të cilin e ekzekutoi Viviani. Portieri Alison grushtoi topin dhe e dërgoi në traversë, por më pas Viviani e shtyu në rrjetë, duke shënuar golin e vetëm të SPAL-it. Pas kësaj fitoreje, Roma shkoi në kuotën e 34 pikëve, po aq sa ka edhe Juventusi i vendit të 3-të, që do të luajë pas pak në ‘San Paolo’, përballë Napolit.
