Barcelona ka marrë një goditje të madhe në ndeshjen e kthimit në ‘Olimpico” përballë Romës, pasi është mposhtur me rezultatin 3-0 që e nxjerr automatikisht jashtë Championsit. Një fitore historike për Romën që arrin të përmbysë një nga ekipet më të mira në Europë.
Ishte Dzeko që hapi siparin e golave që në minutën e 5’, një gol mjaft i bukur që hapi shpresat e romanëve. Dzeko depërtoi në qendër të mbrojtjes së Barcelonës, pas topit të gjatë të marrë nga Daniele De Rossi dhe mposhti portierin Ter Stegen. Dzeko ka shënuar tre gola në ndeshjet e luajtura kundër Barcelona në Champions, më shumë se kundra çdo ekipi tjetër. Barcelona ishte inegzistente gjatë gjithë pjesës së parë dhe Roma humbi dy mundësi me Schick.
Pjesa e dytë nis si e para, është sërish Dzeko protagonist, por këtë herë i fiton një 11 metërsh me mjaft mjeshtëri Piques, që kthehet në gol nga De Rossi. Kjo ishte hera e parë në një vit që Barcelona pëson dy gola në një ndeshje të Champions League, edhe atëherë ndodhi kundër një ekipi italian, Juventus, më 11 prill 2017.
Ter Stegen bëri një pritje vendimtare ndaj El Shaaraëy duke i mohuar golin e tre verdhekuqve, që do të ishte i barasvlershëm me kualifikimin e vendasve. Gjithsesi, nëntë minuta para fundit, gjatë një goditje nga këndi, qendërmbrojtësi grek Manolas realizoi golin e tretë për Romën me goditje të saktë me kokë, duke shënuar një gol historik, të paharrueshëm në “Olimpico”.
