Presidenti i Filipinve, Rodrigo Duterte, po mendon të mos e përdorë më smartfonin e tij me frikën se CIA vazhdimisht përgjon bisedat e tij dhe mund të përdorë informacionet e tij private për ta vrarë atë.
“E di, SHBA po më përgjon. Jam i sigurt se këtë po e bën CIA, është ajo që do të më vrasë”, tha të martën Duterte në Cebu City.
Ai ka përsëritur frikën se Uashingtoni mund të kërkojë rrëzimin e tij, pasi ai po vepron i pavarur me politikën dhe ka shprehur gatishmërinë për të blerë armë nga furnizues të tjerë globalë jashtë SHBA-së.
Për të shmangur përgjimet e mundshme të smartfonit nga fuqitë e jashtme, të cilat sipas Dutertes përpos SHBA-së mund të jenë edhe Rusia, Kina, Izraeli apo Indonezia, ai po mendon të kthehet në përdorimin e një celulari të thjeshtë, me të cilin përgjimi do të ishte më i vështirë.
Udhëheqësi 73-vjeçar u tregua modest, duke thënë se nuk është njohës i mirë i pajisjeve teknologjike pasi një herë ka gabuar duke u dërguar një informacion të klasifikuar të gjithë kontakteve që ishin listuar në Viberin e tij, pasi aksidentalisht kishte klikuar në funksionin “Dërgo te të gjithë.
Duterte ka kohë që ka frikë se CIA mund të jetë duke u përpjekur për hakmarrje pas përkeqësimit të raporteve me Uashingtonin.
Të premten e kaluar, Duterte edhe njëherë përsëriti se CIA “e donte të vdekur”.
Refuzimi i Uashingtonit për të shitur armë zjarri në Filipine, pas shqetësimeve rreth të dhënave për shkelje të të drejtave të njeriut nga qeveria filipinase gjatë luftës së saj të vazhdueshme ndaj drogës, e ka detyruar Duterte të kërkojë furnizues të rinj të armëve.
Manila, e cila prej kohësh varej nga SHBA-të për furnizimet me armë, ktheu “kursin” nga Kina dhe Rusia siç raportin RT “për të mbushur boshllëkun”, përcjell Telegrafi.
Rusia dhe Filipinet nënshkruan një marrëveshje të bashkëpunimit ushtarak vitin e kaluar, ku Rusia kishte furnizuar falas me mbi 5,000 Kallasha Filipinet, për të ndihmuar këtë të fundit në luftën kundër kryengritjes islamike.
Marrëdhëniet SHBA-Filipine, megjithatë, nuk kanë qenë kurrë të bazuara në respekt të ndërsjellë, theksoi Duterte, duke thënë se Uashingtonit kurrë nuk e ka trajtuar Manilën si një partner të barabartë.
“Marrëdhëniet? Kur kishte vërtetë marrëdhënie të bazuara në reciprocitet dhe respekt të ndërsjellë? ” , Pyeti Duterte, duke theksuar se përderisa SHBA shisnin pajisje ushtarake të rinovuara, Kina dhe Rusia ofrojnë furnizime të reja, pa parakushte./Telegrafi/
