Gjiganti financiar JPMorgan Chase & Co. ka publikuar listën e tij vjetore me destinacionet dhe trendet që do të përcaktojnë mënyrën e udhëtimit dhe gastronomisë në vitin 2026, duke përfshirë për herë të parë edhe Rivierën Shqiptare mes vendeve më të përzgjedhura për pushime dhe përvoja unike.
Lista “26 Trips to Take in 2026”, e kuruar nga Chase Travel, vendos Shqipërinë krah emrave të mëdhenj të turizmit botëror si Côte d’Azur në Francë, Botsvana, Arktiku Kanadez, shkretëtira e Atacamas në Kili dhe Dolomitet në Itali.
Përzgjedhja është bërë bazuar në të dhënat e rezervimeve, tendencat e konsumatorëve, ngjarjet kulturore dhe hapjet e reja në industrinë e turizmit.
Sipas raportit, viti 2026 do të shënojë një epokë të re të udhëtimeve, ku përvoja dhe autenticiteti vijnë përpara luksit të shfrenuar.
Disa nga tendencat më të spikatura përfshijnë rilindjen e udhëtimeve rrugore; premiumifikimin e ushqimit, me konsumatorët që janë gati të paguajnë më shumë për cilësi e përvoja të reja; atraksionet nga fenomenet natyrore si eklipset, migrimet e balenave apo netët e yjve në shkretëtira; infrastrukturën e re që hap destinacione të reja, si zgjerimi i fluturimeve direkte që e bëjnë më të lehtë se kurrë arritjen në vende si Shqipëria, India, Bahama apo Botsvana; apo shfrytëzimin e eventeve kulturore e sportive si arsye për udhëtim.
Përfshirja e Rivierës Shqiptare në listën e Chase Travel është një moment i rëndësishëm për Shqipërinë, pasi përbën një njohje të drejtpërdrejtë të potencialit turistik të vendit tonë.
Në një treg global ku udhëtimet po bëhen gjithnjë e më selektive, prania e Shqipërisë përkrah destinacioneve elitare si Côte d’Azur apo Atacama e pozicionon vendin si një alternativë autentike mes luksit dhe natyrës.
Studimi i Chase u zhvillua nga 6 deri më 19 gusht 2025, me 4,091 pjesëmarrës të moshës 18–60 vjeç, të cilët udhëtojnë dhe frekuentojnë restorante rregullisht. Marzhi i gabimit është plus-minus 2 pikë përqindjeje, me nivel besueshmërie 95%.
JPMorgan Chase është një nga institucionet financiare më të mëdha në botë dhe banka më e madhe në SHBA sipas aseteve.
