Hyundai ka lajmëruar mbërritjen e teknologjisë me skanim të gjurmëve të gishtërinjve për të hapur Hyundai-n e ri ‘Santa Fe’. Do të jetë modeli i parë që, prej vitit 2019, do të shpalosë sistemin e hapjes dhe ndezjen e makinës pa pasur nevojë për çelës, duke përdorur dy lexues të gjurmëve të gishtërinjve, të vendosur përkatësisht te doreza e jashtme e makinës dhe pranë timonit, në butonin e ndezjes së motorit.
Funksionimi i sistemit është kolauduar në sektorin smartphone dhe tablet prej kohësh tashmë, ndërsa është një risi absolute te makinat. Hyundai siguroj edhe besueshmëri absolute në aspektin e sigurisë në transmetimin e të dhënave dhe mundësisë së hyrjes së paautorizuar.
Marzhi i gabimit të leximit të të dhënave digjitale është 1 në 50 mijë, që do të thotë që ekziston një mundësi në 50 mijë që sistemi të mashtrohet dhe të autorizojë personin e gabuar. Siguri ekstreme, krahasuar me çelësat e zakonshëm, që mund të të humbasin, të mbeten brenda në makinë pa dashje, apo të klonohen.
