Ditët e fundit politika shqiptare është përfshirë nga një debat për rikthimin e vizave nga Holanda, pas një artikulli të publikuar nga gazeta “De Telegraaf” e këtij shtetit.
E ftuar në studion e lajmeve të Top Channel ka qenë ambasadorja e Shqipërisë në Holandë, Aida Sakiqi, e cila është shprehur se një raport i tillë nuk ekziston.
“Nuk bëhet fjalë për një raport, por për një artikull të një gazete. Ai është një artikull i shkurtër me një intervistë me një polic. U habita kur e pashë artikullin e përkthyer si raport në disa media në Shqipëri. Në artikull thuhet se ekziston një memo, normalisht duhet të ekzistojë një gjë e tillë, nga ana e policisë, por nuk është raport”, ka sqaruar ambasadorja Aida Sakiqi.
E pyetur se nëse mund të rrezikohet rikthimi i regjimit për t’u pajisur me viza për të lëvizur në vendet e zonës Shengen, ambasadorja Sakiqi e sheh si të pamundur që kjo të ndodhë duke theksuar se ky është një vendim i shumë shteteve, jo vetëm i Holandës.
“Ky rrezik nuk ekziston, është një vendim i shumë vendeve. Nuk ka pasur asnjë kërkesë të autoriteteve holandeze. Jam interesuar dhe kam marrë sigurinë se një raport i tillë nuk ekziston”, tha ajo.
Si nisi debati për kthimin e vizave?
Një raport i Policisë dhe Prokurorisë holandeze mbi rrezikun e kriminalitetit shqiptar sugjeron kthimin e regjimit të vizave për vendin tonë.
Dokumenti në fjalë i është drejtuar vet qeverisë holandeze, e cila në fakt nuk ka bërë ndonjë kërkesë zyrtare apo publike për ashpërsimin e masave, ndaj shqiptarëve që futen në zonën “Schengen”.
Ndërkohë, gjatë së martës 3 deputetë holandezë të Partisë Social-Demokrate i kanë adresuar Ministrisë së Jashtme dhe asaj të Drejtësisë një shkresë me 12 pyetje, ku kërkojnë të hidhet dritë nëse është vërejtur rritja e kriminalitetit shqiptar në Holandë, si dhe u janë referuar një sërë artikujsh dhe publikimesh nga shtete të ndryshme të BE-së, ku flitet për kriminalitetin shqiptar, për të cilat kërkohet të dihet nëse janë marrë parasysh nga autoritetet holandeze.
Tre deputetët, pjesë e partisë CDA në Holandë, që në vitin 2013 i kërkoi zyrtarisht qeverisë holandeze mosdhënien e statusit të vendit kandidat për anëtarësim në BE Shqipërisë, kërkojnë të marrin përgjigje për këto pyetje brenda dy javëve.
Në vendin tonë debati përfshiu edhe politikën. Ish-kryeministri Berisha akuzoi me një status në “Facebook” qeverinë, ndërkohë që po nga “Facebook”-u ka ardhur edhe reagimi i ministrit të Jashtëm, Ditmir Bushati. Ky i fundit komentoi duke thënë se “Gjinkallat e dëshpëruara të 25 Qershorit po i kalojnë ethet e gushtit me klithma për kthimin e vizave!”.
Ndërkohë të dielën erdhi edhe reagimi i drejtoreshës së Përgjithshme të Kufirit dhe Emigracionit, e cila tha se nuk ka pasur asnjë ankesë nga Holanda për çështjen e shqiptarëve që udhëtojnë pa viza në zonën “Schengen”.
