Ministri i Brendshëm, Taulant Balla u shpreh sot se, reshjet e dëborës dhe të shiut po vijojnë në disa zona të vendit.
“Prezenca e akullit dhe e ujit në rrugë shtojnë rrezikun për përfshirje në ngjarje rrugore, ndaj duhet vigjilencë e shtuar nga të gjithë përdoruesit e rrugës”, theksoi Balla në një reagim.
Balla ndau video nga puna e shërbimeve të Policisë së Shtetit në zonat e prekura nga reshjet.
“Shërbimet e Policisë së Shtetit do të vijojnë të jenë në gatishmëri dhe prezente në rrugë, 24/7, ndërkohë që ARRSH dhe njësitë e qeverisjes vendore vijojnë të punojnë për pastrimin e dëborës dhe për hedhjen e kripës në akse rrugore”, shtoi Balla.
“Drejtuesit e automjeteve duhet të rritin vigjilencën dhe të zbatojnë me përpikëri rregullat e qarkullimit rrugor, si dhe të ndjekin udhëzimet e Policisë dhe të autoriteteve të tjera shtetërore”, nënvizoi Balla.
