Radio Evropa e Lirë ka zbuluar një skemë të gjerë kontratash publike që lidhen me kompaninë “Rad 028”, në pronësi të Radulle Steviç, e cila rezulton të përfitojë miliona euro nga institucionet serbe, pavarësisht se është e sanksionuar nga SHBA-të dhe e përfshirë në hetime serioze në Kosovë.
Kompania, sipas REL, figuron e regjistruar në një adresë në Zveçan, por në terren ndërtesa rezulton e zbrazët dhe pa aktivitet, ndërsa dyshohet se është zhvendosur në Rashkë (Serbi). Në sistemin e prokurimit publik në Serbi, “Rad 028” ka fituar dhjetëra kontrata të reja vetëm gjatë viteve të fundit, me vlera që shkojnë në miliona euro.
Sanksione dhe akuza të rënda
Pronari i kompanisë, Radulle Steviç, është nën sanksione të Shteteve të Bashkuara për lidhje me Milan Radoiçiç dhe Zvonko Veselinoviç, si dhe për dyshime për krim të organizuar dhe korrupsion. Në Kosovë, ai përballet me akuza për përfshirje në sulmin e armatosur në Banjskë dhe për pastrim parash.
Beogradi zyrtar i ka mohuar këto akuza.
Vetëm gjatë vitit 2025, kompania ka lidhur mbi 30 kontrata me vlerë mbi 6.4 milionë euro, ndërsa në vitin 2026 edhe dhjetëra të tjera, ku shumica nuk figurojnë të përfunduara.
REL raporton se: shumë projekte nuk janë gjetur në terren, në disa raste nuk ka asnjë gjurmë punimesh,
mungojnë tabelat dhe shenjat e ndërtimit dhe se vetëm një pjesë e vogël e kontratave figuron e realizuar në dokumente.
Projektet përfshijnë: shkolla dhe spitale, shtëpi për familje në nevojë, objekte fetare, infrastrukturë në komunat me shumicë serbe në Kosovë.
Sipas REL dhe burimeve lokale, kontratat shpesh jepen nga struktura të financuara nga Serbia në Kosovë, të njohura si “organe të përkohshme komunale”, të cilat Prishtina i konsideron të paligjshme.
Opozitarë lokalë dhe analistë në Beograd thonë se një pjesë e fondeve që Serbia dërgon për komunitetin serb në Kosovë nuk shkon realisht te qytetarët, por kontrollohet nga rrjete politike dhe kontraktorë të lidhur me pushtetin.
Dyshime për mungesë kontrolli dhe transparence
REL thekson se: kompania ka vetëm rreth 9 të punësuar, por realizon projekte me miliona euro dhe nuk është e qartë nëse përdor nënkontraktorë. Në shumë raste, institucionet serbe nuk kanë dhënë përgjigje për mënyrën e dhënies së kontratave apo mbikëqyrjen e punimeve.
Hetimi i REL sugjeron një sistem të paqartë dhe të pakontrolluar të shpërndarjes së fondeve publike në zonat me shumicë serbe në Kosovë, ku kompania “Rad 028” shfaqet si një nga përfitueset kryesore, pavarësisht sanksioneve ndërkombëtare dhe mungesës së transparencës në terren.
