Gjykata e Apelit ka liruar nga burgu ish-anëtari i UÇK-së Dritan Goxhaj. Burime për mediat bëjnë me dije se ditën e sotme Apeli ka refuzuar estradimin e Goxhajt në Hagë, duke rrëzuar kështu vendimin e Shallës së Parë.
Dritan Goxhaj u arrestua më 31 korrik për llogari të Gjykatës Speciale, pasi akuzohej për kryerjen e veprave penale “Frikësimi gjatë procedurës penale” dhe “Pengimi i personit zyrtar në kryerjen e detyrave zyrtare”, parashikuar nga legjislacioni penal i Republikës së Kosovës. Arrstimi i tij u bë me pretendimin se ka nxjerrë emrat e dëshmitarëve të disa çështjeve penale, të ngritura pas përfundimit të luftës në Kosovë.
Më herët avokati i Goxhajt, Bashkim Nikolla, e ka konsideruar mbajtjen e klientit të tij në burg si vendim me prapavijë politike dhe ka theksuar se klienti i tij është i pafajshëm.
Dritan Goxhaj iu bashkua UÇK-së si oficer i Ushtrisë Shqiptare në shkollën e aviacionit dhe ka pasur autorizimin e Shtabit të Përgjithshëm që të mbante kontakte me komandën e Forcave Amerikane në Shqipëri.
