Kreu i ri i Akademisë së Shkencave, Gudar Beqiraj iu ka kthyer një përgjigje të gjithë kritikëve të tij duke theksuar se secili që ka propozimet për reformimin e Akademisë së Shkencave le t’i paraqesë ato në mbledhjet e këtij institucioni dhe jo përmes medias.
Në mbledhjen e këtij institucioni për ngritjen e komisionit të ri akademik, Beqiraj iu referua kritikave të shumta të akademikut Artan Fuga, Beqiraj ka vënë në dukje se gjithë ata që mendojnë se Akademia është e kalbëzuar duhet të paraqesin propozime konkrete dhe jo të “shkruajnë në copëza letrash” siç i cilësoi ai mediat online. “Unë nuk shkruaj nëpër copëza letrash, apo portalesh. Dhe të mos shkruajë nëpër portale se Akademia është e kalbëzuar. Ne kemi bërë në 8 vite një punë kolosale me aq mundësi sa ka pasur Akademia. Po të vijë këtu dhe të paraqesë propozimet e veta”, u shpreh Beqiraj.
Ndërkaq, akademikja Floresha Dado tha se institucioni shkencor kërkon një reformim të thellë dhe i duhet dhënë një përgjigje kritikave dhe akuzave që kanë ardhur nga akademikët dhe qeveria. “Jemi përpara akuzash publike që na diskreditojnë. Është një problem ku jemi në përplasje me kryeministrin. Ne duhet të dalim të gjithë hapur për të reformuar Akademinë e Shkencave. Ne duhet të zgjidhim problemin në marrëdhënie me qeverinë. Ne jemi të vendosur që Asambleja t’i hyjë një pune serioze për të reformuar Akademinë e Shkencave. Situata është jo normale. Nuk e meritojnë atë qëndrim fyes dhe ofendues”, tha ajo.
