Momenti i nisjes së Sebastian Vettel, në Çmimin e Madh të Kinës, ka qenë objekt diskutimesh në periudhën pas garës. Në veçanti, ka qenë kreu i skuderisë së Red Bullit, Christian Horner, ai që ka kërkuar sqarime nga Federata Ndërkombëtare e Automobilizmit.
Pas xhiros së formatimit, gjermani i Ferrarit e kishte vendosur njëvendëshen e tij, jo në mënyrë perfekte, brenda kufizimeve të bardha të nisjes, por ishte zhvendosur ndjeshëm në të majtë. Qëllimi kryesor i tij ishte i qartë: të evitonte vendosjen e gomave në pjesën më të rrëshqitshme të pistës, për të shmangur kështu një nisje problematike.
Drejtuesit e garës, pas një hetimi të shpejtë vendosën të mos e ndëshkonin gjermanin, sepse, siç thotë rregullorja, pilotët duhet të pozicionohen “brenda pozicioneve të tyre të nisjes”, pa iu referuar në mënyrë specifike vizave të bardha që kufizojnë hapësirën e nisjes.
Megjithatë, Horner ka kërkuar shpjegime. “Ishte mëse e dukshme dhe e kuptueshme ajo që donte të bënte Sebastian. Donte t’i vendoste gomat në pjesën më pak të lagur të pistës. Por është e nevojshme që FIA të sqarojë: piloti duhet të qëndrojë brenda hapësirës së kufizuar nga vijat e bardha, apo thjesht të qëndrojë pas vijës së nisjes. Sebastian nuk fitoi ndonjë avantazh prej këtij veprimi, por nevojitet gjithsesi një sqarim”, tha kreu i Red Bullit, Horner.
FIA mund të ofrojë detaje të mëtejshme mbi këtë në garat e ardhshme, por shton se “mirëkuptimi” është i nevojshëm mbi atë se çfarë mund të bëhet dhe çfarë jo në momentin e pozicionimit në vijën e startit.
