Planifikimi sportiv i Realit të Madridit 2023-‘24 po debatohet në fillim të sezonit për dy fakte të padiskutueshme: mungesën e golave dhe mungesën e sulmuesve në skuadër.
Skuadra e bardhë ka përqindjen më të ulët të konvertimit dhe ka vetëm katër sulmues në listë, argumente të mjaftueshme për të “akuzuar” drejtuesit sportivë për planifikim të dobët të sezonit. Madridi, megjithatë, kishte një strategji të planifikuar në mënyrë perfekte, por që u hodh në erë në fillim të qershorit, kur Benzema vendosi të largohej për në Arabinë Saudite, duke mos lënë më vend për manovrim.
Planet e Realit nuk ishin që të përballonte sezonin me Viniciusin, Rodrigon, Hoselun dhe Brahim Diazin si të vetmit sulmues. Plani i hartuar në muajt mars dhe prill kishte në plan të parë Karim Benzemanë. Reali e quante të mbyllur kapitullin e sulmit, teksa nënshkrimi i sezonit do të ishte Bellingami. Anglezi erdhi në fakt, por ikja e Benzemasë la një boshllëk që ka nisur të ndihet qartë në Madrid. Shpenzimi për Bellingamin ishte i madh, por ishte vetëm hapi i parë për përgatitjen për vitin 2024 me Mbapenë në agjendë.
Klubi i bardhë parashikonte që largimi i Benzemasë të bëhej në vitin 2024 dhe jo në vitin 2023, ndaj nuk kishte buxhet për nënshkrimin e një sulmuesi të madh për këtë sezon. Në momentin që Benzema u largua nga Madridi, për Realin filluan të dëgjoheshin emrat e sulmuesve më të mirë. I pari ishte Kejn, më pas Mbape. Por as njëri dhe as tjetri nuk mundën të veshin fanellën e bardhë dhe tani me sezonin e filluar situata nuk duket shumë premtuese.
