Pas vendimit për largimin e tyre nga Teatri “Migjeni” në Shkodër me motivacionin “mungesë efikasiteti, produktiviteti dhe cilësie”, aktorët Vladimir Doda dhe Simon Shkreli kanë reaguar, duke e cilësuar vendimin si të padrejtë dhe të motivuar politikisht.
Aktorët shprehën habi për mënyrën e trajtimit, duke theksuar se nuk kanë marrë asnjë vërejtje zyrtare apo njoftim paraprak. Vladimir Doda u shpreh se nuk janë dhënë kriteret konkrete të vlerësimit, ndërsa akuzoi drejtuesit se kanë përdorur justifikime të pabazuara.
“Na është thënë se nuk kemi efikasitet dhe cilësi, por pa asnjë dokument, asnjë vlerësim të qartë. Mua më është thënë se jam skualifikuar nga disa regjisorë, gjë që nuk është e vërtetë. Regjisorë vendas dhe të huaj më kanë përzgjedhur për role. Ky është një vendim arbitrar dhe i pabazuar,” – tha Doda.
Simon Shkreli shkoi më tej, duke akuzuar Bashkinë Shkodër dhe Zyrën e Kulturës për prishje të qëllimshme të trupës lokale dhe zëvendësimin e saj me produksione të jashtme, për qëllime financiare dhe justifikim të projekteve.
“Në këtë teatër sot nuk vlerësohet puna, por përkatësia. Më është thënë se nuk kam refuzuar role, dhe këtë e kam provuar me pjesëmarrjen time në shfaqje, përfshirë premierën e fundit me shkollën ‘Jordan Misja’. Në të kaluarën, vetë drejtorja aktuale, Sara Smaja, është përjashtuar nga ky teatër për mungesë në punë dhe refuzim rolesh,” – u shpreh Shkreli. Ai theksoi gjithashtu se bashkëshortja e tij është kryetare e degës lokale të PD-së, duke nënkuptuar se shkarkimi i tij është hakmarrje politike.
Të dy aktorët kanë paralajmëruar ndjekje të rrugës ligjore për të kundërshtuar vendimin, ndërsa kërkojnë transparencë dhe hetim për mënyrën si po menaxhohet Teatri “Migjeni” dhe fondet e tij. “Nuk më ka futur politika në teatër, por politika po më heq,” – përfundoi Shkreli.
Aktorët pretendojnë se shkarkimi i tyre është pjesë e një fushate për të kontrolluar skenën artistike dhe për të margjinalizuar zërat kritikë.
