Dy efektivë policie morën plagë të lehta një ditë më parë, pasi u goditën me sëpatë nga një 43-vjeçar me probleme mendore, i cili kishte mbyllur në shtëpi djalin e tij 17-vjeçar.
Ngjarja u shënua në lagjen “30 Vjetori” në Berat, ku autori u neutralizua në një kohë të shpejtë nga policia, pasi kjo e fundit u sinjalizua nga fqinjët e shqetësuar.
Shtetasi me inicialet A.D, 43-vjeç, për disa orë në shtëpinë e tij dhunonte psikologjikisht djalin 17-vjeçar, Xh.D., dhe e kyçi në banesë duke mos e lejuar të dilte. Ai kishte kujdestarinë e djalit pas divorcit vite më parë nga bashkëshortja e tij, e cila është larguar nga banesa.
Ndodhur në kushtet e rëndesës së gjendjes për shkak se kishte probleme me shëndetin mendor, autori mbante djalin të izoluar brenda dhe për këtë është njoftuar policia.
Pas denoncimit nga fqinjët e shqetësuar, uniformat blu dhe forca të zjarrfikëses, kanë shkuar në apartamentin ku jetonte burri dhe kanë arritur të nxjerrin djalin. Por për këtë janë dashur disa momente negocimi, pasi 43-vjeçari nuk pranonte të vetëdorëzohej.
“Shtetasi A.D., gjithashtu kundërshtoi me forcë punonjësit e policisë për t’ju shmangur shoqërimit, duke i goditur me sëpatë e sende të forta, për pasojë u dëmtuan lehtë dy efektivë policie”, bëjnë me dije uniformat blu.
Sakaq, adoleshenti është marrë në pyetje nga ku ka rikonfirmuar se së fundmi shëndeti mendor i të atit ishte në përkeqësim, dhe se ditën e djeshme pas një debati mes tyre, ai e kishte mbajtur peng, duke mos e lejuar që të dilte jashtë, e madje e kërcënonte.
